اهديكم هذه القصيدة للشاعر الكبير / صقر النصافي رحمه الله
وهو ينصح ولده [علي] وهي :
ياعلي خل العيـد لام الدناديـش
اللي تفرك كـل يـوم ٍ جسدهـا
تبغي تماري ناقضات العكاريـش
في كل ملفـاح ٍ تنقـض جعدهـا
العيد عيد الله ولو فـات حتيـش
من حسبة أيام ٍ يمـرك عددهـا
نبي نعلمك المساري على الجيش
تمشي ذلولك لين يفتـر جهدهـا
خابرك مانت بضاري ٍ للمطاريش
نبيك تونس حلوها مـن نكدهـا
ليله على مسرى وليلهٍ مغابيـش
وليله نخلي نومها لمـن رقدهـا
وليله على تمره وليله على عيش
وليله نوكلك الشحم صيـد يدهـا
ياعلي لاجيت العرب لاتجي ديش
خبل ٍ ليا جاب السوالف سردهـا
إحفظ لسانك لايجي فيه تبطيـش
صبح عيونك كايـدات ٍ رمدهـا
يجيك من ينشدك نشـدة تقتيـش
يبـي يسنـع هرجـة ٍ يعتمدهـا
خله يقوم مفلت ٍ في يـده ريـش
يروح منك وحاجتـه ماوجدهـا
ترى دعابيل الخبـول الفوانيـش
تبدي بما فيهـا ولاحـد ٍ نشدهـا
يجيك واحدهم يـورّش توّريـش
عجاجته يسبق مطرهـا رعدهـا
ولا لعمقات السوالـف مناقيـش
قراية الكلمه علـى أول عددهـا
تجي سوالفهم بضحـك وتبهيـش
وقلوبهـم محـد ٍ يفكـك عقدهـا