يالله عفوك يوم تصفية الحساب *** يوم حصاد لما زرعنا في السنين
يوم الحشر قرب ولا معنا زهاب *** الـيوم في الدنيا وبكره راحلين
نجمع ذنوب ونرتجي عفو وثواب *** وعلى نصر ربي لنا مستعجلين
تدرون ليه آمالنا كنها سراب ؟ *** تدرون ليه النصر سيف الأولين؟
الأولين أعمالهم وفق الكتاب *** قاموا عليه وباعوا الدنيا بدين
وحنا غفلنا بين ما لذ وطــاب *** والنصر سيف ما يسله غافلين
نصبح على شوف انتهاكات وخراب *** ونمسي على دمع وتنهات ونين
بصدورنا شي تذوب إله الهضاب *** وأفعالنا والواقع رياح وطحين
وعلى العيون من الفتن مثل الضباب *** ماعاد ندري من يسار ومن يمين
ما للضعيف إلا الدعا لو ما يجاب *** ما غيره إلا الشوف مكتوف اليدين
يالله زلزل تحت الأعداء التراب *** والطف بنا واحقن دماء المسلمين
ندعيك يا قادر على جعل السحاب *** جيش لنصر قلة مستضعفين
أغرقهم بنوع من أنواع العقاب *** غرق الغلام اللي يحسب أنه فطين
لو ما عصا نوح نجابه في رحاب *** سفينته وأمضى معه ف العمر حين
لكنه اختار الخسارة والذهاب *** إصنع بهم صنعك به وأنت المتين
وإلا خذهم يا مجريٍ سود الحقاب *** أخذ العجوز اللي بقت في الغابرين
ذوقهم اللهم أنواع العذاب *** اللي عثوا في أرضك من المفسدين
وألطف بمن لبسوا من التقوى ثياب *** عبادك المستهدفين المتقين
تكالبت عليهم أنياب الذئاب *** ولا غير عونك يا معين الصابرين
من بينهم شيبة يعجزون الشباب *** من وقفته من طولها في الركعتين
ومن بينهم عذرا توّن بلا حجاب *** حجابها لفوا به الجرح المكين
تصيح ما هو من ألم ولا صواب *** تبغي الحجاب اللي خذوه المسعفين
وطفل عن عيون أمه الثنتين غاب *** تبكيه عين وتلتفت لأخيه عين
من هول ما يجري لهم شاب الغراب *** يا وسع حلمك وأنت ما فوقك مدين
أدعيك وأنت أدرى بحال أهل المصاب *** وأمد كفي لك يا أكرم الأكرمين
للمبدع / محمد بن فطيس
