إن صار زود المال بيدين الأنذال
حنّــا من المعروف تندا يدينا
وإن كانهم شرهوا على طيب الأفعال
حنّا وردنا جمامها وارتوينا
وإن فـكّروا للجــود يمشون رحّـــال
حنّـــا قبل يمشون يمّه خطينا
يـا مــا لبسـنا للشــرف كل سـربال
وعلى البسيطة للفضيلة مشينا
في دوحة العرب لنا مجد وظلال
وحنّـــا على در المــكارم غذينا
لو نجمع اللي فـات منا من المال
إن كـان شيّــدنا القـصـور وبنينا
نعطـي ولا نتـبع عطانا بالأقوال
ونبــذل ونسكـت كنــنا ما عطينا
وإن باعــوا الشيمة بدينار وريال
حنّــا دخلنا ســـوقها واشتــرينا
نطلع لها لو هي على روس الأقـذال
لو هو عسيـرٍ دربــــــها ما أنثنــينا
بأفعـــالنا نــرسم دروبٍ للأجــــيال
إليــا نســاها غــيــرنا ما نسيــــنا
أســود ســادات ٍ تسجـــل للأشـبـال
فضـــايل ٍ شـــمــنا لــهــا واهتــدينا
بيـــض ٍ نسجــلهـن جديدات وســمـال
حفــايـــظ ٍ لاحــفادنا اللاحقينا
نصبــر على الشّـدات لو شيلنا مال
لو ســـال دم دفــوفـــنا ما شــكـــينا
نخــــاف يلــقى ســـدنــا كل ختّــال
ويبـني هزيــلات المعـــاني علينا
الليــل يا خـــالد عـــلى والــدك طال
وهنّــيــت نـــاس ٍ بالكــــرا نايمينا
يا عــز راســـي شفت ما خبث البال
شــــي ٍ يهــوّل شيّــب الجاهلينا
شي ٍ من أسبابه يشـيّـب بالاطــفال
فطّـر خشـــوم مهجــرعات الحـنيـنا
أدير قـــالات ٍ عــريضـــات وطـــوال
قــالات خــلـــنّ المخـــفىّ يبـيـنا
منهن رزين العقــل بالوقت يهتــال
بوقــــت ٍ عبــــوس ٍ فطّـن الغافلينا
وقت ٍ من أسبــابه شكــى كــل ريبال
نصـبر ونســكت كنــنا غـــايبينا
الـنــاس بالأيــــام راحــــل ونّــــزال
وتفـجـــعهــم الدنـيا وهم دالهـــينا
وحيــات رب ٍ نــزّل آيـــات الانــفـال
عـــالم خفــــايا نـيــة الحــاقدينا
ما أتــرك طريق العدل في كل الاحوال
لـو يـــرحـــل المــريخ للفرقدينا
للشاعر الكبير /
محمد الأحمد السديري ( رحمه الله )
...
