ماهمني حب عنتر ولا عبله
واهل المحبه من اولها ليا اتلاها
ولا حب راعي الابل لآ ولعته ابله
الحب للي عساني كلي افداها
أحبها حب لا بعده ولا قبله
يا جعلني نذر رجليها ومطاها
رزقي وخيري وجودي اليا قصر حبله
وهموم الأيام سوت بي سواياها
والهم بقلبي يطرب له ويلعب له
وشطون الأيام ورتني خباياها
ترفع إيديها ويمتها على قبله
تدعي وتطلب وربي يسمع دعاءها
إن أقبلت مثل نوٍ طايحٍ وبله
وإن غيبت غابت الفرحة وطرياها
لبيه يا صوتها لا لامس الطبله
كأني مليكٍ على أقصى الأرض وأدناها
