يا حمد يا بيك خذها لو أن عادك صغير
ضم ضايعها وتلقى معك مردودها
خل في عينيك كبير الربع دايم كبير
بارك الله في رجال تقدر عودها
جات بك ركعة ضعيف مع الثلث الأخير
التزم بركوعها والتزم بسجودها
بشروني بك وسقت البشارة للبشير
والبشاير بين ربع الرجال تزودها
النوايا يا حمد دلو والأيام بير
والمضامي يبس من طول أملها عودها
أهقى بك خير ما دام بالهقوات خير
والسحابة فوق رأسك تدن رعودها
لقني وجهك على شان أقرر لك مصير
البيوت اللي تشيّد على عمودها
بنت أبوها يا حمد فسرت معنى الأسير
حزن روحي يا حمد عندها وسعودها
ناقة ما استاسمت وسم جدانك تصير
شعرة من شعر وجهك ما دمت تقودها
لا تعذرب للبدو ناقة ولا بعير
ما اغلا عند البدو يا حمد من ذودها
والخطا لا جاك من شخص لكن شخص غير
الجماعة انتبه نقصها من زودها
القصير الله أكبر يا بيك من القصير
قول تكفى يا قصيري لا عاد تعودها
سودة قلوب النشامى ماهي سودة عسير
كل من طقه ولعها يروح يرودها
وامنع بخشم السلاح الشجاع المستجير
امنعه ويموت غل العرب بكبودها
لا تكذب دون حقه ولو جاك النذيز
لو يكذب محزم البندق وبارودها
والعهد لله ثم الوطن ثم الأمير
يا حمد وش الرجاجيل لولا عهودها
صقرتني لك ليال الزمن صقار طير
افرزوها طرح طرح وجاك يسودها
يا حمد وإن طعتني ضف جنحانك وطير
جود خلق الله من ماجودها
للشاعر / علي الغياثين المري
